موجة سخرية مريرة سادت منصات التواصل الاجتماعي (الاعلام البديل ) بعد فشل نظام التابلت الذي تم تطبيقه على طلاب أولى ثانوي، حيث تعطل السيستم في أكثر من لجنة على مستوى الجمهورية، واختلط الحابل بالنابل، وأدى بعض الطلاب امتحان اللغة العربية الكترونيا، وأداه آخرون ورقيا.

شهدت عدة محافظات تظاهرات منددة بالنظام التعليمي الجديدة وندد طالبات بمحافظة الاسماعيلية بوزير التربية والتعليم طارق شوقي، مطالبن بإقالته فورا.

برأي أحمد حافظ محرر شؤون التعليم في بوابة الأهرام فإن ما حصل النهاردة في امتحان العربي لأولى ثانوي، محصلش في تاريخ مصر.

وفصل حافظ رأيه فيما حدث قائلا:

جزء من الطلبة دخلت تمتحن إلكتروني، معرفوش يدخلوا على سيستم الامتحانات، فاللجان وزعت عليهم الامتحان ورقي، وبعد مرور نصف الوقت في بعض اللجان، السيستم اشتغل إلكتروني، راحوا أخدوا الورق من الطلبة وخلوهم يكملوا الامتحان إلكتروني.

جزء تاني من الطلبة معرفوش يمتحنوا إلكتروني خالص والسيستم مشتغلش وامتحنوا ورقي من أول سؤال لآخر سؤال.

جزء تالت من الطلبة ربنا كان مسهلها معاهم فامتحنوا إلكتروني من أول سؤال لآخر سؤال.

جزء رابع من الطلبة مش محسوبين ضمن الطلبة اللى هتمتحن بالتابلت أصلا، راحوا النهاردة امتحنوا ورقي.. مش علشان السيستم واقع، لأ، علشان هم مش ضمن طلبة التابلت.

جزء خامس من الطلاب، وهم طلاب المدارس الخاصة اللي راحوا يمتحنوا فترة مسائية.. دخلوا اللجان الساعة واحدة ظهرا، ولحد الساعة 3 عصرا، اللجان بتحاول تشغل السيستم الإلكتروني وللأسف مشتغلش، والطلبة قاعدين ما بيعملوش حاجة، لحد ما عطفوا عليهم الساعة 3 ووزعوا عليهم امتحان ورقي، وللأسف كل لأسف، جمعوا منهم الورق الساعة 4، يعني الامتحان مدته 3 ساعات، الطلبة استفادوا ساعة واحدة (الكلام ده من لسان أكتر من طالب مش تأليف).”.

وتساءل حافظ:” بأي منطق يستمر هذا الوضع؟ بأي مبرر تصر الحكومة على استمرار هذا التخبط؟ بأي دليل يخرج أي مسئول يقول إننا نجحنا بنسبة كبيرة في أول أيام الامتحان.

بأي ذنب يكون عندك طالب صايم في عز الحر ده، وتوديه الامتحان فترة مسائية بحجة إنك عايزة يمتحن إلكتروني في مدرسة جاهزة بالإنترنت، وحضرتك مش عارف تشغل سيستم الامتحانات؟.. بأي ذنب تقعده من الساعة 1 الظهر لحد 3 العصر ما بيعملش حاجة غير إنه متذنب ومنتظر سعادتك تشغل السيستم وبعدين تمتحنه ورقي لمدة ساعة واحدة؟

يعني إيه تمتحن طلبة نص الوقت ورقي ونص الوقت إلكتروني؟ حضرتك هتدي الطالب الدرجة على أنهي امتحان؟ حضرتك هتقول ده يستحق ينجح وده يستحق يسقط على أي أساس؟.

حضرتك قلت إن أساس التطوير مش في التابلت ولا في الامتحان الإلكتروني، إنما في طريقة الأسئلة.. طب ليه بقى مصمم تعكنن على الطلبة وأهاليهم ما دام التطوير مش في التابلت، ما تمتحن الطلبة ورقي وسيبهم يستخدموا التابلت في البحث والمذاكرة والاطلاع على الكتب الخارجية اللى انت موفرة ليهم على التابلت، وتحل الأزمة خالص، وترجع طلبة الفترة المسائية تمتحن مع طلبة الفترة الصباحية، وكله يمتحن ورقي.

أنا بكلم حضرتك باللغة اللي انت بتكلمني بيها.. قلت إن التابلت مش هو التطوير والأسئلة الجديدة هي التطوير.. يبقى حضرتك تركن التابلت على جنب شوية، وتختبرني في أساس التطوير بطريقة ورقية.

ليه يكون عندي طلبة في دفعة واحدة، وكل واحد يمتحن بطريقة شكل؟ ليه أكون طالب مجتهد من أول السنة ومأدي واجبي على أكمل وجه وحضرتك تساويني بالطالب اللي مبيعرفش يكتب اسمه، لمجرد إن السيستم وقع وكان فيه مشكلة ولازم تعوض الطلبة كلهم، أو تنجحهم كلهم.. هل ده عدل ولا دي مساواة؟.”.

وتابع قائلا: “أنا بحترم دكتور طارق شوقي وزير التعليم جدا، كقامة وفكر وثقافة وعلامة، لكن التحديات أكبر منه بكتير جدا، والتسريع خطر جدا، ومحدش ضد تطوير التعليم، ولا الارتقاء بالطلبة ومستواهم وثقافتهم، بس لما حضرتك تكون مستعد ومعالج كل الأخطاء ابقى نفذ والناس كلها هتقف وراك.

ليه الحكومة تحمل الطالب وأسرته أخطائها وتحاسبهم على حاجات مكنوش شركاء فيها.. واجب الناس عليها أخلاقيا وسياسيا إنك تأجل تطبيق التابلت في الامتحانات لحد ما تكون مستعد بنسبة 100%.. كفاية قلق وتوتر وضغط على أعصاب الطلبة وأهاليهم.

كفاية تجارب، كفاية عناد، كفاية ترفعوا تقارير بمعلومات خاطئة، كفاية تقولوا للناس كلام ملوش واقع، كفاية تقحموا اسم رئيس الجمهورية في دعم مشروع معظم الناس رافضاه، كفاية وراجعوا نفسكم.. مش عيب نقول هنأجل التطبيق شوية علشان نبقى ماشيين تمام، بالعكس الناس هتحترمكم أكتر.

اجعلوا التابلت بديلا لعشرات الكتب سنويا وطوروا المناهج بتحديثها على التابلت دون خسارة الملايين كل عام، مع إضافة الكتب الخارجية على التابلت مجانا كما وعدتم الطلاب، على أن تستمر الامتحانات ورقية، مع تطوير شكل وطريقة الامتحانات كما تريدون وامسكوا العصا من المنتصف، لتستريح الحكومة ويستريح الطالب وأهله.”.

واختتم بتوجيه رسالة إلى رئيس الجمهورية قائلا: “بصفتك أنت من قررت تطوير التعليم ولك الشكر، وأنت من وافقت على الامتحانات الإلكترونية لكنهم لم يحسنوا التنفيذ، وبصفتك من قررت دعم تجربة التطوير وتحملت مسئولة القرار، أقول لك بصدق: اللي بيحصل في طلبة أولى ثانوي حرام وظلم ولا علاقة له من قريب أو بعيد بما عاهدت ووعدت به الشعب. اللهم قد بلغت، اللهم فاشهد”.

على الجانب الآخر سادت منصات التواصل الاجتماعي موجة من السخرية المصحوبة بالمرارة ، حيث علق أحد النشطاء قائلا: “فرنسا بلد متخلفة مفيش فيها امتحان بالتابلت

مصر متقدمة عن فرنسا والامتحان بالتابلت بس السيستم وقع ضحك كالبكا”.

ونشر آخر صورة الفنان الراحل وهو يقول: “افتح يا سيستم”! في اشارة الى فيلمه الشهير  “على بابا والأربعين حرامي” حين قال جملته الشهيرة:

افتح يا سمسم.