مشكلتي كبيرة واريد مساعده ولااريد تعليقات جارحه ازا سمحتو

3/23/2010 10:52:00 AM

انا شاب اسمي ايمن من فلسطين..حبيت بنت من 4 سنين وعلاقتي فيها قوية جدا جدا خلال هاي السنين حصلت بينا عدة مشاكل وكل مشكلة اصعب من اللي قبلها وكنا نفترق بالاشهر ونرجع لبعض لانا فعلا بنحب بعض..علاقتي في البنت جدا قوية وكان يحصل بينا بعض الامور اللي نابعه عن حب ومشاعر ونية صافية وما اصدنا نتسلا بس عشان الجنس والحكي..مابنكر انها باستني وبستها وحضنتها لا اكتر من هيك..كل مانفترق والفراق كان بسببها لانها كانت احيانا ماتحترمني وتغلط عليي ولكن بعد فترة ارجع اصالحها لاني مابدي اخسرها وتخسرني وبنفس الوقت مابدي احط خطية البنت برقبتي لاجل اللي حصل بينا...بعد عدة مشاكل وكل مشكلة كان اتدخل فيها اهلي وتوصل فيها للاهانه كمان وغلط كبيييييييير ترجع تحكيلي اخر مرة وانا تغيرت واسفه وكنت اقبل بصلحها لاني بحبها وللسبب اللي زكرتو من شوي..خلال فترة سنه حصلت عندي عدة ظروف منها وفاة جدتي وعمتي وخلال هاي الفترة كنا متفقين انا نخطب بس ماكانت تقدر ظروفي وتحكيلي بدك تيجي تخطبني غصب عنك انا ماالي بظروفك..ردينا فترقنا وبعدها بفترة رجعنا تصالحنا ووعدتني مايتكرر اللي عملتو لكن بشهر 10 الماضي عملت مشكلة كبيرة ووصلت لاهلي واهلها وكنت طالب منها ما تدخل الاهالي ولكن هي دخلتهم والاهانه كبرت ضدي وعلى اثرها فترقنا ومن فترة بسيطه بشهر 2 رجعت تصالحني وتترجاني وكمان طلبت تشوفني وحلفتلي عالمصحف انها تغيرت ومن هالحكي ولليوم لساها بتترجى نرجع لبعض..انا مابنكر بحبها وبدي اياها ومابقدر اعيش بدونها بس بدي تجاوبوني على اسئلتي...اكتر من مرة وعدتني معقول هالمرة صادقه انا مش قادر اصدقها؟؟؟كل مرة بقول مابدي اتركها لانو حصل بينا شغلات وحرام نترك بعض شو اعمل؟؟؟اهلي كانو يحبوها بس بسبب اللي عملتو اتجاهم واتجاهي صارو يكرهوها وحكولي مستحيل نرضى بهاي البنت زوجه الك؟؟؟شو اعمل انا لو قتنعت ارجعلها بس اهلي شو رح يقنعهم لانهم مصرين مايخطبوها بعد كل اللي عملتو وهي بصراحه عملت عمايل صعب احكيها ..بقولولي اهلي هاي البنت مابتتامن عبيت عاللي شفنا منها..شو اعمل انصحوني..انا الشي الوحيد اللي كاسر ضهري وخايف منو ومابدي تنحط الخطية برقبتي هو اني حضنتها وبستها لا اكتر من هيك وقسما بالله الي حصل كلو نابع عن حب..احكولي شو اعمل؟